Во Гостивар за два дена против грип вакцинирани 70 лица

Вакцинацијата против сезонски грип со бесплатни дози во Гостивар почна вчера (11 ноември), а во првите два дена се потрошиле околу 70 вакцини. Поради ковид пандемијата вакцинирањето не се врши во епидемиолошката служба, како претходните години, туку во објектот на Трудова медицина. За Гостивар обезбедени се 400 дози бесплатни вакцини кои се наменети за ранливите групи граѓани: лица над 65 години, хронично болни, бремени жени, здравствените работници и деца до 5 години.

„Вакцинацијата почна вчера и се одвива без проблеми. Граѓаните доаѓаат во закажаните термини со почитување на мерките за заштита од коронавирус и не се создаваат гужви. Термините до утре(петок) се зафатени, а според најавите кои ги имаме од надлежните во Скопје, нови термини за следната недела ќе бидат пуштени утре“, информираше д-р Лепа Царовска, специјалист по спортска медицина, одговорна за вакцинацијата во Трудова.

Термините граѓаните треба да ги закажат преку матичните лекари.

Деновиве се очекува да почне и вакцинацијата со комерцијалните вакцини, кои ќе чинат по 800 денари.