Во Гостивар запишани 530 првачиња, највозбудени и во центарот на вниманието денес

Новата учебна година денеска започна во сите основни и средни училишта на гостиварската територија. Како и вообичаено, учениците на првиот училиштен ден се запознаваат со предметите што ќе ги изучуваат и се дели распоредот, но најголемото внимание секако го добиваат првачињата. За нив во училиштата се организираат свечени приеми и тие се распределуваат кај своите учителки. Првоодделенците добиваат честитки, желби за успех и среќен почеток од сите страни, од родителите, баби, дедовци, роднини..

Во училиштата на територијата на Општина Гостивар во учебната 2023/2024-та година запишани се 530 првачиња, што е за четириесетина помалку од лани. Во четирите гостиварски средни училишта пак, во прва година тргнаа околу 700 ученици.

Од општинскиот Сектор за образование информираа дека во текот на летниот период биле извршени зафати и инвестиции низ училиштата за да се подобрат условите за учениците и наставниот кадар.