Во гостиварско-тетовски регион во саботната вечер откриени 12 пијани возачи

Во рамките на континуираните активности за поголем ред и безбедност во сообраќајот, Секторот за внатрешни работи Тетово ноќеска од 22 до 4 часот, спроведе уште една од серијата акциски контроли на возачи – дали и колку од нив управуваат под дејство на алкохол.

При контролата биле откриени и санкционирани 12 возачи (ТЕ-10 и ГВ-2), кои управувале “алкохолизирани”, од кои кај еден биле измерени до 2 промили алкохол во крвта. Сите веднаш се исклучени од сообраќај, а на 8 возачи времено им се одземени и нивните возачки дозволи, информира портпаролот на СВР, Марјан Јосифоски.

Покрсј тоа, изготвени им се и поднесоци и прекршителите ќе се соочат со парични глоби од 225 до 275 евра во денарска противвредност, зависно од степенот на нивната алкохолизираност.

СВР Тетово апелира до возачите да избегнуваат консумирање алкохол, зашто ја доведуваат во ризик сопствената и безбедноста на другите учесници во сообраќајот. Ова, дотолку повеќе што во полн ек е сезона на свадбени и други свечености и секоја чашка алкохол плус може да биде фатална.