Во гостиварско Зубовце традиционално прославен празникот Огнена Марија

Со црковно-народни обичаи во гостиварското село Зубовце денес, традиционално беше прославен православниот празник во чест на велокомаченицата Св.Марина-Огнена Марија. Оваа светица е заштитничка на селото и мештаните на денешен ден ја оддаваат својата почит кон неа.

Утрово во црквата која го носи името на велокомаченицата Св. Марина, беше отслужена Света златоустова литургија. Митрополитот Тетовско-гостиварски г. Јосиф, изврши водосвет и ги благосливи кумските лебови.

Одбележувањето на големиот ден за Зубовце продолжи со заедничка веселба во кругот на храмот, кадешто освен жителите на селото се собраа и голем број на гости.

Инаку, црквата Св. Марина е изградена пред повеќе од 160 години, врз темелите на многу постара црква, додека фрескоживописот на храмот го насликал познатиот Дичо Зограф, со својата тајфа.

фото:тетовско-гостиварска епархија