Во хотели во Маврово има 135 лица во државен карантин – ги обезбедува војска и полиција, општина М.Ростуше се вклучува со комунални услуги

Во државен карантин во два хотели во Маврово, од вчеравечер сместени се 135 македонски граѓани кои допатуваа од странски земји. Според најавите, вечерва во трет хотел треба да бидат згрижени уште 61 лице, кои ќе пристигнат во земјава од странство.

За 14 дневниот државен карантин важат посебни протоколи. Граѓаните не смеат да ги напуштаат собите, добиваат по три оброци дневно, потребни средства за хигиена и сл.

Во обезбедувањето при транспортот и престојот на граѓаните учествува армијата и екипи од Одделението за внатрешни работи Гостивар, а Општина Маврово Ростуше се вклучува преку комуналните служби во делот на правилно отстранување на отпадот.

„На територијата на Општина Маврово и Ростуше во два хотели сместени се 135 лица во државен карантин, коишто се дојдени од западно европските земји преку организираниот превоз. Нив ги обезбедува полицијата и армијата, а ние се вклучуваме како општина преку Јавното комунално претпријатие за да ги опслужиме тие граѓани. Инаку, моментално состојбата на територијата на Општина Маврово и Ростуше е стабилна. До сега немаме инфицирани лица со коронавирус. Се надеваме дека со максимално почитување на препораките од Владата и Министерство нема да имаме заболени. Упатувам уште еден апел до граѓаните да ги почитуваме препораките за да избегнеме ширење на вирусот.“, изјави градоначалникот на Маврово Ростуше, Медат Куртовски.