Во интернатот во Гостивар интензивно се работи на подобрување на условите за престој на учениците

Подновени соби, занимални, реновирани тоалети, разубавен хол, просторија за пинг-понг…Во средношколскиот интернат во Гостивар интензивно се работи на подобрување на условите, како за учениците, така и за вработените. Последните неколку години, според податоците на службите, во објектот биле инвестирани околу 100 илјади евра. Со домаќинско работење се постигнува да се издвојат пари за разни зафати и со постоечкиот буџет, рече Линдихана Салаи Сулејмани, директорка на интернатот.

„Секогаш се трудиме и наш приоритет е да создадеме подобри услови. Нашата институција се грижи за сместување на средношколците, затоа нашите цели се тоа да биде што подобро. Буџетот е лимитиран, но со правилна распределба, со домаќинско работење, со штедење, може многу да се постигне“, рече директорката.

Во посета на интернатот денес беше општинското раководство.

При оваа пригода градоначалникот на Гостивар за интернатот подари плакета со симболот на градот Саат кулата.

„Овој средношколски дом беше во катастрофална состојба, ништо не било инвестирано 30 години. Во последните три години интернатот сосема го промени ликот. Со добро раководење се успева да се постигне резултат. 34 реновирани соби, библиотека, реновирани канцеларии за администрација, нова кујна, вратите се сменети, и се оди понатаму на нови инвестиции. Секоја чест за директорката. “, изјави Арбен Таравари, градоначалник на Гостивар

Со последните зафати интернатот го зголеми капацитетот и може да згрижи до околу 300 ученици. Актуелно заради ковид пандемијата домот работи под посебни протоколи и престојуваат помал број на средношколци од селата, кои имаат потреба од сместување заради посетување практична настава.