Во јуни во Гостивар фатени над 270 брзи возачи, некои ќе платат и по 400 евра казни

Во текот на јуни на подрачјето на СВР Тетово биле преземени вкупно 661 мерка за пречекорување на максимално дозволената брзина во и надвор од населено место (Тетово-388 и Гостивар-273). На сите прекршители изготвени им се соодветни поднесоци и ќе се соочат со парични глоби кои, зависно од големината на пречекорувањето, се движат од 20 до 400 евра во денарска противвредност, информира полицијата.

„Највисоки глоби (Тетово-19 и Гостивар-7) следуваат за најбрзите, за оние кои ја пречекориле пропишаната брзина за повеќе од 70 километри на час, а потоа и за оние кои пречекориле од 50 до 70 километри на час надвор, како и оние кои пречекориле за над 50 километри на час во населено место.“, наведува портпаролот на СВР Тетово, Марјан Јосифоски.

Најголемиот број од прекршоците констатирани се на автопатот Гостивар-Тетово-Скопје и магистралата Гостивар-Кичево.

Секторот за внатрешни работи Тетово уште еднаш со потсетување на возачите непотребно да не брзаат и да ја прилагодат брзината според условите на патот. Ова, дотолку повеќе на подрачјето на СВР Тетово веќе се чувствува зголемена сообраќајна динамика и осетно зголемен е вкупниот број на возила кои секојдневно се движат на подрачјето или транзитираат кон Охрид и Маврово.