Вести

Во Леуново одбележани 75 години од формирањето на партизанскиот одред Кораб

Објавено

пред 7 години

на

15/03/2018

Од

Gostivarpress.mk

Со пригоден собир пред споменикот на паднатите борци и жртви на фашизмот во Леуново, беа одбележани 75 години од формирањето на партизанскиот одред Кораб. Настанот го организираше Општинскиот одбор на Сојузот на борци од Гостивар, на иницијатива на Стојан Блажески, кој пред присутните се осврна на раѓањето, задачите и целите на одредот.

„Мавровско-гостиварскиот одред Кораб бил формиран на 14-ти март 1943 година, во месноста Арамиски камен во старата жандармериска станица во непосредна близина на селото Леуново оддалечено 4 километри на патот од Тајмиште. При самото формирање, одредот броеше 15 борци, но за десетина дена во неговите редови пристапија уште 13 борци. Покрај борци од Мавровско, имаше и од Гостивар, Тетово, Крушево, Вруток и други места. Во судбоносните денови за македонскиот народ, борците од одредот Кораб живееја целосно во војнички режим со стражи и дежурства и одиграа значајна улога во борбата за слобода“, подвлече Блажески.

На одбележувањето, кратко обраќање имаше и претседателот на ОО Сојуз на борци – Гостивар, Радислав Ѓиноски.