Во Македонија најголем дел од вакцинираните против ковид примиле Спутник

Според неделниот извештај на Институтот за јавно здравје во периодот од 26 април до 2 мај 2021, тестирани се вкупно 14.975 материјали, а регистрирани сe 2.076 нови позитивни случаи од 34 градови во државата. Процентот на новозаразени е со намалување од 39,7% во однос на минатата недела.

Најголем дел од регистрираните случаи се од Скопје (857; 41,5%).

Регистрирани се заболени лица во сите возрасни групи. Најзастапена е возрасната група на лица на возраст над 60 (781). Голем број на заболени се регистрира и кај лицата во возрасните групи од 50-59 (349), 40-49 (333), 30-39 (323) и 20-29 (172). Најмал број е регистриран кај децата од 0-9 (33) и 10-19 години (85).

По добиени 2 негативни теста за присуство на SARS-CoV-2 или со употреба на новиот алгоритам, со статус „оздравени“ се стекнале 4.012 лица кои биле хоспитализирани или на домашно лекување, со намалување од 34,5% во споредба со минатата недела.

Пријавени се 167 смртни случаи од 22 градови, 20,9% помалку во однос на минатата недела. Во однос на возраста, 150 лицa биле над 60 години, 15 лица на возраст од 50-59 години и по едно лице од возрасните групи од 30-39 и 40-49 години.

Во однос на вакцинацијата во извештајот се наведува дека заклучно со 2 мај со Pfizer/Biontech вакцинирани се вкупно 19.858 (15.933 со прва доза и 3.925 со втора доза), со Sputnik V се вакцинирани 34.177 (22.768 со прва доза и 11.409 со втора доза), со вакцината на AstraZeneca вкупно се вакцинирани 21.949 лица и со Sinopharm се вакцинирани 953 лица.