Во Маврово и на Шапка по 30-тина сантиметри снег, од утре нови врнежи

Најстудено утрово е на Попова Шапка -7 степени, каде има и најголема снежна покривка од 32 сантиметри, информираат од Управата за хидрометеоролошки работи.

Под нулата е и во Маврови Анови -7, Крушево -6, Битола -5, Крива Паланка, Охрид, Прилеп и Претор -4, Велес и Берово -2, Скопје-Зајчев Рид, Кавадарци, Струмица, Виница и Тетово -2, Штип и Демир Капија -1. Најтопло е во Гевгелија 3 степени.

Во Маврови Анови има 29 сантиметри снег, а во Ѓуриште пет.

Во изминатите 24 часа, до 7 часот утринава најмногу дожд има наврнато во Демир Капија 11 l/m2, потоа Кавадарци -9, Струмица -7, Берово -5, Прилеп -4, Велес, Битола и Виница -2 и Гевгелија, Маврови Анови и Пожаране по еден l/m2.

Времето денеска преку ден ќе биде сончево со мала до умерена локална облачност. Кон крајот на денот и во текот на ноќта облачноста ќе се зголемува. Ќе дува слаб до умерен ветер од јужен и југозападен правец.

Максималната температура ќе достигне од 4 до 9 степени.

Од утре (понеделник) под влијание на циклонска активност и студен воздух од север ќе започнат нови врнежи претежно од снег, во делови од Повардарието од дожд, особено во западниот дел и на исток каде што во понеделник врнежите ќе бидат пообилни ќе се зголеми и ќе се прошири и снежната покривка. Снег ќе има понекаде и во пониските места.