Во неколкучасовна акција во Гостивар откриени 16 технички неисправни возила

Вчера (1 април) од 9 до 13 часот на поширокото гостиварско подрачје била спроведена локална акциска контрола за техничка исправност на возилата и за други видови сообраќајни прекршоци. Во акцијата, реализирана во населбата Малеарди, улиците „Браќа Ѓиновски“, „Илинденска“, на магистралниот пат Гостивар-Кичево и регионалниот пат Гостивар-Дебреше, откриени и санкционирани биле 16 технички неисправни возила, од кои 10 со неисправни сопирачки и 6 со други недостатоци од техничка природа и карактер, по што 10 возила веднаш се исклучени од сообраќај.

При контролата, исто така, санкционирани  се и 5 возачи поради немање дозвола, со впишана забрана за управување и други прекршоци, на кои им се изготвени соодветни поднесоци. Во вчерашната акција откриени и подигнати биле и 4 непрописно  паркирани возила.

Во наредниот период ќе продолжат сообраќајните контроли со цел поголема безбедност на сообраќајот, најави СВР.