Во петок навечер – „Експеримент“ во Гостивар

Гостиварци имаат можност за интересно и несекојдневно театарско доживување, доколку решат дел од петочната вечер да го поминат во Центарот за култура АСНОМ. Во малата сала на Центарот ќе биде изведена претставата „Експеримент“ во продукција на здружението Артопија.

Режисер на претставата е Јане Спасиќ, а настапува млада актерска екипа: Бојан Кирковски, Ненад Митевски, Мартин Јорданоски, Симона Спировска Костовска, Матеја Јанковска, Марија Јанчевска, Михаел Стојановски. Се работи за драма во која акцентот е ставен на начините и методите преку кои системот и ситуацијата влијаат на дехуманизација и деиндивидуализација на индивидуата, притоа постепено насочувајќи ја индивидуата да извршува злосторства „во име“ на системот.

Театар Дунек и Центарот за култура го организираат настанот во чест на одбележувањето на 8-ми декември, Денот на св.Климент Охридски. Почетокот е закажан за 20 часот, а организаторите ветуваат незаборавна театарска вечер и затоплена сала. Влезницата е 100 денари.