Во петок почнува новата ловна сезона, најавени засилени контроли на ловиштата

Задутре (1 октомври) официјално ќе биде отворена новата ловна сезона. Како и секоја година, во пресрет на сезоната, Секторот за внатрешни работи Тетово апелира доследно да се почитува Законот за лов, со цел  навреме да се превенираат, односно пресретнат незаконските постапки на поединци, но  и ловџиите поблиску да бидат информирани за последиците од таквите постапки.

„Санкциите за непочитување на одредбите од Законот за лов се ригорозни и доследно и без исклучоци ќе се применуваат кон сите подеднакво, без разлика дали станува збор за ловџии-почетници или за искусни ловџии. Ловџиите од Полог се потсетуваат, исто така, дека незаконит лов претставува кривично дело, за кое се предвидени парични и казни затвор од една до три, односно пет години, зависно од тоа–кога, каде и каква дивеч е отстрелана (член  228 од Кривичниот законик ).  На ловџиите им се укажува да бидат докрај внимателни при ракувањето со оружјето што го поседуваат  и носат со себе на лов за да не ја доведат во опасност сопственaта и безбедноста на другите, но и да не го даваат оружјето на други лица, пред се на лица кои немаат дозвола за оружје и кои не се членови на ловечко друштво.“, пишува во соопштението од СВР.

Од таму најавуваат дека во соработка со другите служби, значително ќе ги засилат контролите низ ловиштата на подрачјето и ќе преземаат соодветни мерки и активности за спречување и санкционирање на незаконскиот лов.