Во првата смена во ОУ „Единство“ утрово не се држат часови поради неисплатени плати, Синдикатот во преговори

Утрово во ОУ„Единство“ во Гостивар не се одржува настава. Наставниците се решиле на ваков чекор, поради неисплатените плати за ноември што ни го потврдија претставниците на синдикатот од ова училиште.

Плати за ноември нема за вработените во сите основни и средни училишта на подрачјето на општина Гостивар, но таму за сега нема бојкот на наставата. Од Регионалното одделение на Синдикатот за образование соопштија дека се во преговори со градоначалникот и со претседателот на Советот за што побрзо да се изврши исплата на платите.

„Формирана е петчлена работна група која ги врши преговорите. Ние инсистираме да се овозможи наставниците да си ги земат платите што поскоро, сите се со кредити, доѓаат празници. Очекуваме одговор во текот на денот, по што ќе донесеме одлука како Синдикат кои ќе бидат нашите следни чекори“, изјави Тафа Амети, претседател на регионалниот синдикат информирајќи дека одлуката во ОУ„Единство“ е индивидуална.

Исплатата на платите за вработените во образованието се врши со средства од дотации од Министерството за образование и 10% од општинскиот буџет. Парите од Министерството се стигнати, но не е извршен ребаланс на буџетот на општината. Токму одлуката за ребаланс на буџетот за образование беше предмет на препукувања меѓу мнозинството во Советот и локалната власт на последната седница.

Неофицијалните и се уште непотврдени информации се дека во текот на денот градоначалникот Арбен Таравари и претседателот на Советот Насир Муслиу ќе се состанат да се обидат да го надминат проблемот.

Во основните и средни училишта во Гостивар плата чекаат околу 1.000 вработени.