Во регион на Гостивар до сега вкупно 1.028 потврдени случаи на коронавирус

Во силниот есенски бран на коронавирус кој ја погоди земјава, подрачјето на Гостивар за сега останува стабилно. Според статистиката на Институтот за јавно здравје, моментално има 97 активно заразени пациенти и се наоѓа во фаза на понизок ризик од ширење со спорадични случаи.

Од почетокот на пандемијата во регионот на Гостивар со коронавирус биле дијагностицирани вкупно 1.028 лица. Со смртни последици завршиле 57 случаи, додека 874 се евидентирани како оздравени. Најкритичен месец за Гостивар беше август, кога секојдневно се бележеа двоцифрени бројки на новозаразени.

Заклучно со вчера, во Македонија има вкупно 5.555 активно болни со корона. Најпогодени региони се Скопје, Куманово, Струмица, Тетово, Прилеп и Кочани.

Од почетокот на октомври, бројката на заразени секојдневно рапидно расте. Министерот за здравство Венко Филипче најави дека Комисијата за заразни болести ќе предложи дополнителен пакет мерки, кои ќе вклучат целосна забрана за секакви настани,  работно време на сите економски оператори до 23 часот итн.