Во регионот на Гостивар нема нови позитивни на Ковид 19, во земјава 127 потврдени

Институтот за јавно здравје информираше дека во земјава се потврдени вкупно 127 новозаразени со коронавирус. Најмногу од нив, 67 во скопскиот регион, по што следува штипско до 33 и тетовско со 10 нови случаи. Во останатите региони има по помал број новозаболени, додека во општините Гостивар, Врапчиште и Маврово Ростуше во денешната статистика нема нови пациенти со коронавирус, а еден е регистриран како веќе оздравен.

Градоначалникот на Гостивар, Арбен Таравараи кој е претседател на Меѓуопштинскиот кризен штаб рече дека состојбата е релативно стабилна, но дека тоа не значи граѓаните да се олабават и ги повика на доследно почитување на мерките за заштита. Во однос на позитивните пациенти со коронавирус нагласи дека скоро со сите е во постојан контакт и дека повеќето се асимптоматски.

„Контактирам со пациентите, повеќето немаат никакви симптоми и се чувствуваат добро, се надевам дека така и ќе остане. На сите граѓани сакам да им порачам да продолжат да ги почитуваат мерките. Сметам дека Гостивар има помал број на заболени од останатите поголеми градови, токму затоа што граѓаните се однесуваат одговорно и почитуваат мерки“, рече градоначалникот.

Моментално на подрачјето на трите општини од регионот има 28 активни случаи на коронавирус.