Во Словенија и Италија падна снег, невреме во Хрватска

Големите промени во временските услови влијаеја на појава на снег во Словенија во август. Силен бран од северозападниот дел на континентот му донесе на алпското подрачје неочекуван скок од лето во зима.

Снег падна на словенска Кредарица, според податоците, во 9 часот утрово била измерена температура од -3 степени, а биле измерени и 3 сантиметри снежна покривка. Во последните 12 часа паднале 6,3 сантиметри снежни наноси, пренесува „Индекс“.

Додека во италијанскиот скијачки центар Алта Бадиа наврнаа околу 30 сантиметри влажен снег. Овој зимски центар се наоѓа на надморската височина од 1.324 до 2.250 метри.

И во Хрватска има нагли промени во температурите. Во поголем дел од земјата има обилни врнежи од дожд, а најлошо беше во Истра. Во раните утрински часови силно невреме го погоди јужниот дел на Јадранот.