Во срцето на Гостивар 16 дрвца како спомен на жртвите во несреќата кај Ласкарци

Дождливото сиво небо што го обвитка Гостивар денес, како да заплака повторно за трагично загубените животи во големата автобуска несреќа кај Ласкарци од 2019-та година. Семејствата, роднини и пријатели на жртвите се собраа во малиот парк во центарот на градот, каде се засадени 16 дрвца во нивна чест, за вечен спомен.

„Овие 16 дрвца претставуваат симбол на една љубов, едно дрво-еден живот, едно срце за сите, а сите 16 остануваат во нашите срца вечно. Да се сеќаваме, никогаш да не забораваме и да не се повтори“, рече Соња Аврамоска, мајка на загинатиот Бобан Аврамоски.

И во ова прилика, како и претходно семејствата реагираа на одолговлекување на судскиот процес за несреќата.

„Ова е четврта година од трагедијата кај Ласкарци во која загувиме 16 најблиски од нашите семејства, а повеќе од 30 сограѓани се здобија со тешки повреди и трауми до крај на својот живот. Тоа беше тежок удар за сите нас, за нашите семејства , за целиот град Гостивар. Овој периоод е многу тежок и мачен, а судскиот процес е маратонски долг, психичко-емотивно и здравствено исцрпувачки, и за жал заплеткан во судските лавиринти, како да се чека да избледнат сеќавањата и да се заборави трагедијата. Но и покрај сето тоа сите ние заедно тука ќе ги изнесеме правдата и вистината на виделина. Преку засадување на овие дрвца пак ќе се сочуваат спомените и сеќавањата на починатите кои засекогаш ќе останат во нашите срца.“, кажа Синиша Ристоски, брат на загинатиот Дејан Ристоски.

Иницијативата за засадување на дрвцата ја покренаа семејствата, а ја поддржа Јавното претпријатие за паркинзи и зеленило, од каде најавија дека вои следниот период на местото ќе биде поставена спомен плоча со имињата на настраданите.

Во трагедијата која се случи на 13 февруари 2019-та година животите ги загубија: Дејан Ристоски, Раметула Абдураими, Валдете Хамити, Јовица Трпевски, Бесим Фетаи, Онур Садику, Есат Емрули, Ајдин Исмаили, Бејза Узеири, Зоран Давидовски, Бобан Аврамоски, Трпана Јаневска, Павле Костоски, Арсе Арсоски, Ферди Касо и Ерза Османи.