Во тек е пријавување за помош од 50 евра за училишен прибор

Државата ќе доделува по 3.000 денари на средношколци од семејства со ниски приходи, како помош за обезбедување на училишен прибор.

Право на користење имаат редовни ученици, постари од 16 години, членови на семејно домаќинство во кое остварениот просечен месечен доход во семејството по сите основи за 2019 година не е поголем од просечната исплатена нето плата по вработен за месец март 2020 година (26 422 денари) објавена од Државниот завод за статистика.

Пријавувањето се одвива преку интернет платформата www.digitalizirajse.mon.gov.mk. Додека документите може да се достават во хартиена форма до МОН, или да се прикачат електронски на платформата.

Потребни се следните документи:

– потврда од училиштето дека е редовен ученик запишан во јавните средни училишта во учебната 2020/2021 година,

– за финансиската состојба на семејното домаќинство на ученикот, односно неговото потесно семејство

– потврда за последна остварена плата на вработените членови на семејно домаќинство за 2019 година (за родителите – старатели вработени во државни и јавните установи да се достави/прикачи потврда за плата заверена од овластен орган, а за родителите – старатели вработени во приватни фирми да се достави/прикачи потврда за плата како и заверена декларација за плата); за пензионираните членови на семејството да се достави/прикачи документ за висина на пензија – чек; за разведени родители да се достави/прикачи доказ за разводот и доколку кандидатот прима алиментација истата да се прикаже како месечен доход, за корисници на социјална помош да се достави/прикачи последно решение или последен чек

– изјава за користење на личните податоци на ученикот и неговото потесно семејство (родители – старатели, браќа, сестри), со која ученикот се согласува Министерството за образование и наука по службена должност да ги обезбеди потребните документи од одредени институции со кои има склучено договори за соработка.

Рокот за пријавување е 17 август.

Средношколците парите ќе може да ги користат за: тетратки, блок за цртање, прибор за пишување, прибор за боење, бои, ранци, гуми за бришење, калкулатори, глина за моделирање, линијари, шестари, лектири, брајова хартија, како и спортска опрема (спортски обувки и спортска маица и спортски панталони) за потребите на наставата за спорт и спортски активности.