Во топлите месеци во гостиварско има над 100 каснувања од крлежи – заштитете се кога одите во природа

Топлото време ги мами граѓаните слободните денови од викендот да ги искористат за престој и прошетки во природа. Сепак и покрај опуштањето и уживањето, по напорната работна недела, не треба да се заборави на опасностите со кои може да се соочите на отворено, особено овој период, како што се на пример разните инсекти (оси, стршлени и сл.) и крлежите.

Во пролетните и летните месеци на гостиварското подрачје се регистрираат над 100 каснувања од крлежи. Лекарите велат дека среќна околност е што најголемиот дел од пациентите поминуваат со благи симптоми од локална природа, како црвенило и јадеж на местото на каснување. Болест предизвикана од крлежи на гостиварското подрачје не е регистрирана од 2012-та година, кога во месеците мај и јуни имаше по еден случај на Лајмска болест, пренесена од крлеж.

Стручните лица предупредуваат дека е неопходна внимателност, а се препорачуваат превентивни мерки:
-да се носи облека што не остава откриени делови од телото
-краевите на панталоните да се вовлечат во чорапите, а блузите со долги ракави да бидат закопчани до крај
-по можност да се користи специјален спреј против крлежи и инсекти
-да не се нанесуваат парфеми
-да се направи детален преглед на телото по враќање дома
Реакцијата на убоди од крлежи и инсекти е индивидуална. Може да се предизвикаат полесни кожени алергии, црвенила, но и животно-загрозувачки алергиски реакции со гушење.
Лекарите советуваат при каснување од крлеж, задолжително да се побара медицинска помош: „Граѓаните имаат обичај само да се обидуваат да го отстранат крлежот, што е опасно и ризично. Секое нестручно вадење, може да доведе до компликација. Затоа мора да се обратат за помош од лекар“
На лекар треба да се јават и лицата кои по една до две недели откако биле каснати од комарци или крлеж, добиле висока температура, треска и осип по телото, за да се провери дали станува збор за некоја болст пренесена од инсектите.