Во црквата „Света Петка“ во Гостивар литургија и молитва за настраданите во несреќата

Утрово во храмот „Света Петка“ во Гостивар, на празникот Сретение Господово беше отслужена божествена литургија со која чиноначалствуваше Митрополитот тетовско-гостиварски г. Јосиф. Владиката упати зборови на сочувство, длабоко жалење и молитва за загинатите, нивните семејства и повредените во страшната автобуска несреќа што го снајде Гостивар.

„Не верувам дека има човек кој не го погоди ова трагично случување, нема срце кое не затрепери и за упокоените  и за семејствата. Сите не погоди трагедијата, подеднакво сите и сега сме исправени пред потребата да се простиме од своите ближни. Бог е тој што го дава животот и тој одредува кога и како ќе се одделиме од земниот живот, да продолжиме со вечниот живот. Колку и како да говорам ,зборови на утеха не можам да најдам, не можам да понудам мир и спокој, но ги наоѓам во божјите зборови, во нашата вера која е вера на воскресението. Живееме и умираме, секогаш сме господови. Сочувствувајќи со најблиските, родителите, роднините, пријателите ви упатувам зборови на утеха и ветување: советите и сочувствата на црквата ќе бидат секогаш со вас“, рече Митрополитот во својата беседа изразувајќи и желба за што побрзо оздравување на повредените.