Возењето велосипед е незаменлива терапија за телото и умот

Придобивките од возење на велосипед врз телесното и ментално здравје на човеко,т се навистина бројни. Ако ви треба мотив плус, за да го активирате вашиот пријател на две тркала, тогаш погледнете ги децата како уживаат насмеани и полни со енергија, додека возат велосипеди низ вашето маало.

Редовното возење со велосипед, го намалува ризикот од срцеви заболувања дури до 50%, а позитивно влијае и врз работата на белите дробови. За антистрес дејството да не зборуваме. Возењето велосипед е одлична антистрес терапија. Само 20 минути возење влијае врз намалување на хормоните кои предизвикуваат стрес и врз ослободување на ендрофин, хормон на среќата.

Доколку сакате да слабеете, возете велосипед секојдневно. За време од 60 минути возење велосипед ќе потрошите од 500 до 800 калории, зависно од напорот, патеката и слично. И не само што килограмите ќе одат надолу, ќе ги зајакнете и мускулите. При вртењето на педалите работи голема група мускули, на нозете, стомакот и бутовите.

Она што е многу важно е да го подесите седиштето соодветно, за да имате добро држање на телото и да нема никакво оптоварување. Кичмата не треба да биде искривена, а облеката мора да е лесна и практична. Се смета дека најдобро е да се вози наутро и секогаш да се држите до правилото два часа пред возење да не јадете тешка храна или обилен оброк.

Со оглед на убавите временски услови викендов, не треба да се двоумите дали да го извадите велосипедот од подрум. Уште ако си најдете пријатно друштво, возењето ќе ви биде максимално уживање.