Возило удрило во тротинет на улица во Гостивар, девојче е тешко повредено

Вчера (24 ноември) околу 14 часот и 30 минути во СВР Тетово е пријавено дека на улица „ЈНА“ во Гостивар, патничко моторно возило „алфа ромео“ со гостиварски регистарски ознаки управувано од 29-годишниот гостиварц Ш.М. удрило во тротинет што го управувало девојче од Гостивар.

Во несреќата малолетничката се здобила со тешки телесни повреди, констатирани во гостиварската Општа болница „Ферид Мурад“, извести полицијата.

На местото на несреќата увид извршила екипа од Одделението за внатрешни работи Гостивар.

СВР Тетово го повторува апелот и предупредувањето за почитување на правилата од страна на оние кои се движат со велосипеди, тротинети и електрични тротинети.

„Уште еднаш ги потсетуваме велосипедистите, лицата кои се движат со тротинети или електрични тротинети да се придржуваат на правилата за да се избегнат несакани последици. Да возат по велосипедски патеки или по тротоари, а никако по улици. Исто така, апелираме да внимаваат со која брзина се движат.“, нагласува портпаролот на СВР, Марјан Јосифоски.