Вработените во основните училишта во Гостивар се` уште немаат плати за февруари

Доцни исплатата на февруарските плати за вработените во основните училишта на подрачјето на општина Гостивар. Наставниците реагираат дека се ближи крајот на месецот, а тие се уште не зеле плата за претходниот. Прашуваат која е причината и кога ќе им бидат исплатени платите.

Од локалната самоуправа објаснија дека тие ги завршиле своите обврски околу платите, а доцнењето се должи на административните процедури, со оглед на тоа што општината пред една недела донесе Буџет за 2018-та, а до сега беше на мерка „времено финансирање“.

„Откако Советот минатата недела го усвои Буџетот за 2018-та година, истиот беше пуштен во Министерството за финансии на читање, од каде денес добивме одговор дека е одобрен. Значи се работи само за технички аспекти, парите се обезбедени и би требало платите до петок да бидат исплатени“, рекоа од општината.

Од Регионалниот Синдикат за образование за Gostivarpress.mk потврдија дека ја добиле истата информација, нагласија дека ја следат состојбата и доколку до петок наставниците не ги земат платите, ќе се координираат за натамошни чекори. Вработените во средните училишта добиле плати за февруари навреме, затоа што нивните суми не биле опфатени со одредени процедури.

Проблем со платите во образование во општина Гостивар имаше и претходно. Октомвриската доцнеше поради одлука за ребаланс на ланскиот буџет, што пак беше причина за политички препукувања меѓу локалната власт и партиите од мнозинството во Советот. Декемвриската плата не беше исплатена навреме, поради воведување на мерката „времено финансирање“ на општината.

На територијата на општина Гостивар има 11 централни и дваесетина подрачни основни училишта.