За 20-25 дена комплетно ќе заврши асфалтирањето на булеварот „Гоце Делчев“ во Гостивар

Неделава отпочнаа работите за асфалтирање на една од најфреквентните сообраќајници во Гостивар, булеварот „Гоце Делчев“. Проектот ќе ги опфати двете коловозни ленти на потег од Центарот за култура до автобуската станица, во вкупна должина од околу 900 метри.

Денес, работите одблиску ги следеше в.д. градоначалникот на Гостивар, Ваљбон Лимани.

„Се надевам дека со овој проект ќе придонесеме за подобрување на патната инфраструктура во нашиот град, со цел нашите граѓани да имаат подобри услови и да можат слободно да се движат. Според најавите кои ги добивме од фирмата оператор, асфалтирањето целосно би се завршило во период од 20 до 25 дена. Се надевам дека можеби ќе се заврши и во побрз рок“, рече Лимани.

Првиот човек на Гостивар упати апел до инвеститорите и граѓаните кои имаат објекти во изградба во тој дел, да ги направат потребните приклучоци во подземната инфраструктура за да се избегнат оштетувања на асфалтот во иднина.

„Би апелирал до сите кои планираат градежни инвестиции, да се приклучат кон водоводната или канализационата мрежа, со цел после асфалтирањето да не си се сучува да се сече асфалтот и да се прави штета на улицата. Исто така би ги замолил граѓаните за трпение додека траат работите“, кажа Лимани.

За овој зафат ќе бидат издвоени околу 10 милиони денари, без пресметан ДДВ.