За девет месеци 449 кривични дела во Гостивар

Во деветте месеци од годинава, вкупниот криминалитет на тетовско-гостиварското подрачје бележи намалување за 24 проценти во споредба со истиот период лани, соопшти Секторот за внатрешни работи. Во овој период регистрирани се 1069 кривични дела, во Тетово 620 и Гостивар 449, во кои биле инволвирани 552 сторители, а кои се заокружени со 459 кривични пријави, Тетово 309 и Гостивар 150.

Во вкупниот криминалитет најзастапен е класичниот, односно општиот криминал, дури со над 90 проценти, додека далеку помалуброен е економскиот, организираниот и недозволената трговија со дрога и оружје. Во класичниот криминал,пак, кој споредено со минатата година е намален за околу 23 проценти, повторно доминираат имотните деликти, кражбите и тешките кражби, најчесто извршени во куќи, станови, продавници и моторни возила.

Во периодот за кој станува збор класичниот криминал е присутен со 966 кривични дела.Она што е карактеристично е дека намалени се таканаречените потешки кривични дела против животот и телото, како и делата против слободата на човекот, бракот и семејството и против слободата и половиот морал.