За два дена шеесетина граѓани казнети во Гостивар оти не носеле маски

Изминатите два дена, на подрачјето на Гостивар 57 лица биле казнети поради непочитување на правилото за задолжително носење на заштитна опрема на лицето. Според податоците од Секторот за внатрешни работи Тетово, по тој основ во неделата биле изготвени 38 прекршочни платни налози, додека во понеделникот 19.

Казните за непочитување се во висина од 20 евра во денарска противвредност за физичките лица, а за компаниите каде не се почитуваат мерките за носење заштитна опрема за вработените и посетителите, предвидена е казна од 2.000 евра во денарска противвредност.

Уредбата на Владата предвидува задолжително носење на заштитна опрема на устата и носот во затворен простор на сите јавни објекти како државни институции, маркети, продавници, банки, пошти, јавен превоз, чекални, здравствени институции и слично, како и на отворени простори, секогаш кога не може да се одржува минимална дистанца од два метри меѓу граѓаните.

Контролите на полицијата и понатаму продолжуваат секојдневно.