За две недели уште пет лица заболеле од морбили во Гостивар

Во периодот од 14 до 28 јуни, на гостиварското подрачје регистрирани се 5 нови случаи на заразени од мали сипаници, со што вкупната бројка на заболени стигна до 79.

Според податоците од Институтот за јавно здравје, најголемиот број на случаи изминатиот период се лица на возраст над 30 години, а што се однесува до вакциналниот статус, најголем процент се невакцинирани, непотполно вакцинирани или со непознат вакцинален статус.

Од почетокот на епидемијата во декември 2018-та до сега, во земјава има над 1.800 пациенти со мали сипаници лабораториски потврдени, со стапка на заболување од 88,6 на 100.000 жители. Скопје, Куманово, Тетово, Струга и Гостивар се градови со најмногу заразени.

Околу 45% од пациентите со морбили во земјава биле хоспитализирани, а кај 15% се појавиле компликации. Од нив, најголем број компликации биле кај деца од 0-4 години,  што укажува дека оваа возрасна група е најзасегната и подложна на посериозни последици од заболеувањето.