За половина година 140 тепачки, физички напади и други нарушувања на јавен ред и мир во Гостивар

Во првите шест месеци од годината, на подрачјето на Гостивар регистрирани се вкупно 140 нарушувања на јавниот ред и мир. Секторот за внатрешни работи Тетово соопшти дека најголемиот број од нив биле целосно расчистени. Против 184 сторители, инволвирани во прекршоците, биле поднесени 132 барања за поведување прекршочна постапка.

Речиси половина од прекршоците во изминатите шест месеци, вкупно 67 биле физички напади. Тепачки имало 11, караници, викање и непристојно однесување 16 случаи, а евидентирани се и 11 случаи на навредување и омаловажување на овластено службено лице.

Во овој период пријавени се и седум нарушувања на јавниот ред и мир  во и околу училиштата како и едно на спортски натпревар.

Најголемиот број од сторителите биле машки лица, а нарушувањата најчесто се случувале на улицата и во угостителски објекти.