За повеќе зеленило и добри еколошки навики: Првачињата во Гостивар ќе засадуваат дрвца во училишните дворови

Децата кои ќе тргнат во прво одделение оваа учебна година во Гостивар ќе се вклучат во раззеленување на животната средина, преку засадување на дрвца во дворовите на училиштата. Иницијативата дојде од советничката група на СДСМ на денешната седница на Советот на општина Гостивар, и беше прифатена од останатите советници.

„Сигурна сум дека целта на сите од нас е кај децата, уште од најмали нозе да пренесеме позитивни навики, добро е да ги научиме на грижа за околината, зеленилото и пред се, да ги научиме на вистинка грижа за животната средина. Во време кога се повеќе сме опколени со згради, а се помалку со дрвја и зеленило, во името на советничката група на СДСМ предлагам да се дозволи децата запишано во прво одделение во општинските основни училишта да засадат дрвца во нивните училишни дворови и секоја година да се садат онолку дрвца колку што има број на првачиња. Понатаму, децата заедно со нивните учителки ќе се грижат за дрвцата кои што ги засадиле, а на крајот од нивното школување во основно училиште, ќе остават нешто свое. На таков начин, ќе се создаваат генерациски стебла и ќе се помогне за зголемување на вегетацијата во градот. Оттука, барам општината да даде одобрение и да обезбеди доволен број на садници, за секоја нова генерација која ќе почнува во прво одделение во општинските основни училишта.“, кажа советничката Ема Нешковска при образложување на иницијативата.

Доколку во училишните дворови нема доволно место за дрвцата, активноста ќе се спроведе во парковите и други локации предвидени за зелени површини.