За штетите од поплавите во Гостивар ќе се издвојат милион денари, се чека изгласување во Советот

На седницата на Советот на општина Гостивар во понеделникот беше покренета иницијатива за помош на граѓаните кои претрпеа штети од последните поплави во гостиварско. Според предлогот, општината за оваа намена треба да издвои еден милион денари. Советниците и локалната власт беа согласни по ова прашање, но сепак одлуката не дојде на ред за гласање, поради одложување на седницата.

Од општината велат дека се подготвени финансиски да им помогнат на граѓаните чии домови и имоти беа поплавени. Посебна комисија ќе работи на проценка на штетите, а исплата ќе може да се врши, откако ќе биде донесена одлука во општинскиот Совет.

Обилните врнежи од дожд и наглото топење на снегот предизвикаа низа проблеми со излевање на водотеци во гостиварскиот регион. Најпогодени се селата Форино, Балиндол и Мало Турчане, како и населбата Бањешница.

Општинскиот кризен штаб деновиве ја следи состојбата и интервенира по потреба на критичните места.