За време на Галичка свадба посебни правила за отпад и сообраќај во Галичник

Викендов, за време на најголемата културно-туристичка манифестација Галичка свадба, ќе важат посебни правила кои се однесуваат на одлагањето отпад и сообраќајот. Месната заедница Галичник нагласува дека ваквиот „Куќен ред“ се воведува заради непречено и безбедно одржување на настанот, кој се очекува да го проследат огромен број на посетители и гости од земјава и од странство.

„ Сите контејнери и кафези за одлагање отпад ќе се дислоцираат позади хотел Неда. Камион на Јавното комунално препријатие ќе биде паркиран на патот кон Света Петка и ако некому му е неопходно за време на викендот да одложи отпад, ќе треба да го стори тоа директно во камион. Низ Галичник ќе има распоредено дваесет мали канти кои ќе се користат само за одлагање лименки и пластика.“, наведуваат организаторите.
Во однос на сообраќајот, цел викенд е забрането паркирање на паркингот на Пеш, околу Црквата Свети Петар и Павле, на Упија, на коловоз од Црквата Свети Петар и Павле до куќата на Равановци од каде ќе се земе невестата. Сообраќајот со моторни возила низ Галичник денес (сабота, 13 јули) ќе биде забранет од 17.30 до 23 часот, додека утре (недела, 14 јули) од 7.30 до 14 часот.