Забрани за фирми што ги оставиле работниците да работат на жештините

Државните трудови инспектори од областа безбедност и здравје при работа, изминатите три дена вршеле контроли кај работодавачи за почитување на препораките за топлотен бран. Како што соопшти Министерството за труд и социјална политика биле спроведени вкупно 207 инспекциски надзори во целата земја. Инспекторите донеселе 36 решенија за забрани на работодавачи, кои не ги почитувале препораките да не се работи на отворено од 11 до 17 часот.

Контроли биле вршени во повеќе дејности: градежништвото, земјоделие, отпад, комунални услуги, конфекциски погони и други.

Работодавачите ги добиваат препораките во писмена форма со нагласување дека мора да се придржуваат кон нив, бидејќи во спротивно ќе бидат санкционирани, соопштуваат од Министерството. Препораките се: адекватна вентилација и по можност климатизација во затворен работниот простор, да не работат на отворено за време на најтоплиот период од денот, промени во организацијата на работниот процес (воведување две смени работа), обезбедување засолништа каде вработените можат да се разладуваат одреден период во текот на работата, почести паузи во текот на работата и консумирање течности, работната облека да биде од лесна порозна ткаенина, а при работа на отворен простор – очила и капи, предупредување за зголемени опасности од несреќа при работа (пожари).