Зачестени пожари! Горела ниска вегетација во Горна Бањица, Тумчевиште и кај старата касарна

Зачестени се пожарите на отворено периодов во гостиварскиот регион. Противпожарната единица има по неколку интервенции на дневно ниво.

Според последните информации од Центарот за управување со кризи, вчера (8 август) евидентирани се три пожари и тоа во Горна Бањица, Тумчевиште и кај старата касарна. Во сите случаи горела ниска вегетација, а огнот бил изгаснат од страна на пожарникарите.

ЦУК утрово информираше дека од 46 пожари на отворен простор регистрирани вчера во земјава, изгаснати се 37, два се уште се активни и седум се под контрола.

Активни се пожарите во општините Макдонски Брод и Студеничани. Во Македонски Брод, како што соопшти ЦУК, пожарот е во селата Тажево и Брезница и во Јасен и гори борова шума, а во Студеничани пожарот е во село Батинци кај место викано Дрешница и гори мешана шума.

-Под контрола се во Македонски Брод – с.Слатина (нискостеблеста вегетација); Општина Демир Хисар и Општина Охрид: Илинска Планина, активен е кај с.Брежани, Охрид, додека под контрола е на Демир Хисар (ниска вегетација, нискостеблеста шума и букова шума); Општина Петровец – с.Градманци – Дивље (ниска вегетација); Општина Дебар – над селата Горно Косоврасти – Рајчица – Татар Елевци (нискостеблеста шума, трње и ниска вегетација); Општина Охрид: Галичица (нискостеблеста вегетација); Општина Пласница – с.Пласница (изгаснат) – с.Латово (чади, деградирана шума) и Општина Делчево – Депонија Делчево (ѓубриште), наведува ЦУК во соопштението.