Задушница, споменот за починатите останува вечен

Православните христијани денес и утре одбележуваат Задушница, во спомен на најблиските починати од семејството. Обичаите налагаат да се посетат нивните вечни почивалишта, а според црквата на гробот се принесува пченица, лепче и вино, се пали свеќа, а свештеникот опева споменувајќи ги имињата на блиските покојни. Кај граѓаните останал обичај уште од минатото да се носи и раздаваат храна „за душа и покој“. Кај народот постои верување дека заборавањето на душите на покојните може да предизвика суши, поплави, немаштија, болести и други несреќи.

Во недела се празнува Духовден, празник кој го означува слегувањето на Светиот Дух врз апостолите. Празникот уште се вика и Света Тројца затоа што на едно место се јавуваат Таткото, Синот и Светиот Дух. Со одобрение на Богот-таткото се исполнило ветувањето на Богот-син, дадено пред апостолите дека ќе им го испрати Светиот Дух. Со слегувањето на Светиот Дух врз апостолите, тие се исполниле со љубов кон Бога и со желба да го величаат. Овој чин се смета за основање на Христијанската црква.