Заев: Гасоводот Скопје-Тетово-Гостивар ќе биде готов следната година

Владата синоќа во Тетово ја одржа својата редовна 165-та седница во Тетово, како втора од 10-те седници што во наредниот период еднаш месечно, ќе се одржуваат во десет различни региони во државата.

Зборувајќи за проектите коишто се реализираат на полошкото подрачје, премиерот Зоран Заев истакна дека гасоводот Скопје-Тетово-Гостивар ќе биде завршен следната година.

„Гасоводот на делницата Скопје-Тетово-Гостивар во должина од 76 километри, вреден 29 милиони евра, целосно ќе биде изграден во 2020 година, кога ќе го доведеме гасот до граѓаните и компаниите во Гостивар и Тетово со што значително ќе се намалат  трошоците на граѓаните и ќе биде од огромен придонес за намалување на аерозагадувањето.“, рече премиерот.

Меѓу другото, тој се осврна и на неколку зафати во патната инфраструктура во регионот на Полог. „Заврши рехабилитацијата на регионален пат Тетово-Попова Шапка во должина од 18,2 километри, инвестиција вредна 1,7 милиони евра и се подобри пристапноста до скијачкиот центар Попова Шапка за сите посетители. Го рехабилитираме регионален пат Гостивар-Колари-Кичево и извршивме реконструкција на 5 мостови на оваа делница, и на патот до Охрид ја подобруваме безбедноста на сообраќајот за сите возачи.“, рече Заев.