Загадениот воздух годишно убива над 1.000 луѓе во Македонија

Од последиците на загадениот воздух во Mакедонија годишно умираат од 1000 до 1200 луѓе. Земјава е петта во Европа по стапка на смртност од загаденоста на воздухот преку ПМ10 честичките, јавува „Макфакс“.

„Кога е највисока аерозагаденоста и кога се ниски температурите тогаш доаѓа и врвот на бројот на смртни случаи кај постарите или хронично болните. Мерките за намалување на загаденоста се интра-секторски. Урбанистичкото планирање треба да биде такво да еколошкиот елемент биде важен, што кај нас не е така. Над 90 отсто од возилата во Македонија, во Европа не би ги прифатиле бидејќи користат еколошки необработливо гориво. Потребно е да се внимава и на начинот на кој се греат луѓето во зима. Треба синхронизирана акција“, вели Драган Ѓорѓев од Институтот за јавно здравје.

Според професорот Трајче Стафилов од Институтот за хемија на Природно – математичкиот факултет, најголеми извори на загадување се индустријата, а особено согорувањето на горивата.

„Најголемиот удел е од согорувањата во домаќинствата и индустриските објекти. Можните решенија треба да бидат долгорочни од градските органи на ниво на држава како и Владата, за да се намали ваквата состојба“, вели Стафилов.

Инаку пред Македонија, земји со поголемо загадување на воздухот се Бугарија, Србија, Црна Гора, Романија и Унгарија.

извор: „Макфакс“