Законски да се ограничи производството и продажбата на енергетски пијалоци

Енергетските пијалоци се лесно достапни да се купат, а младите често ги злоупотребуват, пиејќи во големи количини или ги мешаат со алкохол, што е опасно по здравјето. Оваа проблематика беше разгледувана на петтиот состанок на Националниот совет за безбедност на храна, што се одржа пред неколку денови.

„За да се спречат негативните последици кои може да бидат предизвикани од прекумерна употреба на енергетски пијалоци, но, пред се` да се ограничи можноста на пазарот да се пласира веќе подготвена комбинација од енергетски пијалак и алкохол, за која досегашните научни истражувања во светски рамки потврдуваат дека може да биде исклучително штетно и опасно по животот и здравјето на луѓето, неопходно е законски да се ограничи нивното производство и продажба. Од исклучителна важност е превенцијата и затоа нужно е и да се работи на креирање на кампањи за подигнување на јавната свест од опасноста која може да ја предизвика прекумерната употреба на енергетските пијалаци и нивното мешање со алкохол.“, истакна директорот на Агенцијата за храна и ветеринарство, Зоран Атанасов, како претседавач со Националниот совет за безбедност на храната,

Без последици по здравјето, возрасните лица може да консумираат најмногу два енергетски пијалаци дневно. Ризик по здравјето постои доколку овој, на пазарот релативно нов тип пијалаци, се комбинираат со алкохол, пракса се поприсутна кај младата популација, кој е и најголем консумент на енергетски пијалаци, наведуваат од Агенцијата за храна.

Според нивните податоци, во првите пет месеци од годинава, увезени се 103 пратки со енергетски пијалаци, со повеќе од 2,2 милиони лименки.