Заменик министерот Шабани го посети интернатот во Гостивар и ја пофали директорката за менаџирањето

Заменик министерот за образование Арафат Шабани денес беше во посета на средношколскиот дом во Гостивар, каде се извршени повеќе зафати за подобрување на условите за сместување на учениците.

Во собите има нов инвентар, реновирани се тоалетите, уредена е просторија за пинг-понг, променети се прозорци и врати, а актуелно се прават и други инвестиции.

„Сакам да и честитам на директорката за успешното менаџирање со интернатот, таа навистина може да биде пример за сите други како треба да се менаџира со една ваква установа. Под капа на Министерството за образование имаме 18 ученички домови во земјава, каде се инвестирани 50 милиони денари во инвентарот, а сега течат инвестици во кујните кои од септември ќе бидат подобро опремени со модерна кујнска апаратура. Од утре почнува аплицирањето за сместување во ученичките домови по електронски пат и во таа насока ги поттикнуваме сите ученици кои ги исполнуваат условите да се пријават“, рече Шабани.

Интернатот во Гостивар има капацитетот да згрижи околу 300 ученици во посебни делови за машки и женски.

„Му благодарам на заменик министерот и претставницте од Секторот за ученички и студентски стандард што дојдоа на лице место да ја видат нашата работа, инвестирањето, трудот секој денар да се вложи каде што е потребно. Настојуваме да нудиме што подобри услови за сместување и исхрана и простории за забава и спортско-рекреативни активности“, истакна директорката Линдихана Салаи Сулејмани.

Наредни планови за интернатот се уредување на дворната површина, како и санација на фасадата на објектот.