Замор, главоболка, меланхолија…Што се‘ дождот предизвикува кај некои луѓе?

Патите ли од главоболка секогаш кога врне дожд? Дали ви се менува расположението и немате волја за никакви активности на тмурно време? Ви се случува ли да ве „вртат коските“ и да ве нападне поспаност во услови на облачност? Доколу е така, а имате здрав организам, тогаш е јасно дека страдате од метеопатија и тешко ги поднесувате деновите како што е овој.

Метеопатијата е еден вид здравствен проблем кој се јавува под дејство на влијанието на метеоролошките фактори, меѓу кои промени на температурата, влажноста и воздушниот притисок, ветер, дожд, грмотевици. Лекарите велат дека метеопатијата полека, но сигурно станува многу честа болест на модерниот живот. Анализите покажале дека гледано по полови, жените се позасегнати од проблемот. Дури 30% од вкупната женска популација во светот, страда од оваа појава.

Најизразени симптоми на метеопатија се: меланхолија, главоболка, намалена концентрација, мрзоволност, болки и непријатност во зглобовите. Иако медицината се` уште ја нема официјално прогласено како дијагноза и болест, не значи дека метеопатите ги измислуваат симптомите и секако треба да преземат мерки за да ги ублажат.

За полесно пребродување на долгите врнежливи денови, се препорачуваат некои општи мерки значајни за подобрување на здравјето на телоти и психата. Иако врне, во текот на денот минимум да се пешачи по еден час. Да се пијат чаеви и тоа: зелен чај, чај од камилица, нане и маточина и да се пие поголема количина на вода. Наутро да се појадуваат житарици,а ручекот да биде богат со зеленчук. Задолжително да се најде време за одмор и релаксација во мир и тишина за да се намали стресот.