Започна новата учебна година

Летниот распуст заврши и од денес започна новата учебна година 2018-2019. Учениците се враќаат во училишните клупи и на секојдневните обврски со учење и домашни задачи. Вообичаено првите денови од учебната година се користат за запознавање со распореди, наставните програми и се друго што ќе им биде потребно на децата за следење на наставата.

Иако беа најавени новини во однос на намалување на бројот на часови за основците, укинување на работните саботи, поедноставување на електронскиот дневник, сепак тие нема да започнат веднаш, туку мора да ги почекаат измените во законската регулатива.

Во 22 учебника за основно и во два за средно образование се направени измени и тие ќе им бидат доставени на учениците, а новина од овој септември е тоа што учениците од прво до трето одделение секоја година ќе добиваат нови комплети учебници.