Започна пролетниот дел во 2 МФЛ – На локалното дерби ФК Вардар од Форино не се појави на терен

Викендов, после нешто повеќе од 2 месеци, започна пролетниот дел во двете лиги Исток и Запад од Втората македонска фудбалска лига. Но, продолжетокот на натпреварувањето донесе несакани сцени на фудбалското борилиште во Гостивар.

Во западната конференција во рамки на 17. коло требаше да се сретнат екипите на ФК Вардар од Форино и ФК Гостивар, но на овој натпревар официјалните домаќини не се појавија на теренот.

На закажаниот почеток во 14 часот на теренот во Градскиот стадион во Гостивар, се појавија службените лица и фудбалерите на гостинскиот тим, но ги немаше оние на Вардар Форино. Според правилата се причека 30 минути, по што судијата покажа крај на овој неодигран натпревар.

Нема дополнителни информации околу причината поради која форинци не се појавија на натпреварот, најверојатно Гостивар ќе добие службена победа.

Ова е втор натпревар сезонава за ФК Вардар од Форино да не излезе на терен, што според правилата на ФФМ, следи исклучување од лигата и преселба во понизок ранг, а Втората лига – запад, ќе продолжи со 9 екипи.

По комплетирањето на колото, ФК Гостивар со 33 бода се наоѓа на 2. позиција на табелата со заостанување од 7 бодови позади лидерот ФК Скопје, додека Вардар Форино е на последната позиција со 10 бодови.