Започна сечењето на дрвја во градскиот парк во Гостивар

Во големиот градски парк во Гостивар, денеска започна сечење на дрвјата, што беа одбележани како ризични по минувачите. Акцијата ја спроведува Јавното претпријатие за паркинзи и зеленило, кое претходно организираше јавна дебата по ова прашање. Надлежните велат дека се постигнало разбирање со невладините организации и граѓаните.

„После јавната дебата, формиравме петчлена комисија: два члена од нашето претпријатие, два од невладините организации и еден граѓанин. Одлучивме да се исечат пет дрвја, што се потенцијален ризик за минувачите и денес започнавме со нивно сечење.“, изјави Беќим Челебиу, директор на ЈП за паркинзи и зеленило.

Паркот нема да остане без дрвја и зеленило, ветуваат од претпријатието. За делот кадешто денес се сечеа дрвја, кај детското игралиште, има посебен проект којшто ќе се реализира со турска донација. „Ќе бидат засадени околу 400 нови садници. Ја чекаме донацијата од Турција и штом ја добиеме, веднаш ќе започнеме со активностите за раззеленување“, рече Челебиу.