Започнува четвртфиналето од Лигата на шампионите: дерби натпревари во Лондон и Минхен

Со натпреварите помеѓу Арсенал и Реал Мадрид, односно Баерн Минхен и Интер, вечерва започнува четвртфиналната фаза од Лигата на шампионите.

Во завршницата од најпрестижното европско клупско натпреварување остануваат по два претставници од Германија, Англија и Шпанија, како и по еден од Франција и Италија.

Победникот од двомечот Арсенал – Реал Мадрид ќе се сретне во полуфиналето со подобриот од дуелот ПСЖ – Астон Вила, додека победникот од натпреварот Барселона – Борусија Дортмунд ќе игра против оној што ќе го помине четвртфиналето меѓу Баерн и Интер.

Дербито меѓу Арсенал и Реал Мадрид привлекува особено внимание, со оглед на тоа што и двете екипи се соочуваат со резултатска криза и внатрешни тензии.

Во тимот на Реал се уште не се знае со каков состав ќе настапат, со оглед на проблемите со повредите, недоволната вклопеност на Мбапе во формацијата, и ограничените алтернативи во нападот. Од друга страна, Арсенал исто така се соочува со кадровски проблеми, особено во нападот, каде што веќе некое време како најистурен играч настапува дефанзивниот играч Микел Мерино.

Во другите четвртфинални парови, ПСЖ важи за фаворит против Астон Вила, додека натпреварот меѓу Баерн и Интер се најавува како исклучително изедначен.

Финалето од Лигата на шампионите оваа сезона ќе се одигра токму во Минхен, што е дополнителна мотивација за германскиот шампион.