Заврши регуларниот дел од сезоната – КК Гостивар првпат во битка за опстанок

Со одигрувањето на 22. коло викендов, заврши регуларниот дел од машкиот кошаркарски шампионат во сезоната 2024/2025. Познати се сите четвртфинални парови во плеј-офот и екипите кои ќе играат плеј-аут за опстанок.

Во оваа фаза, натпреварите ќе се играат до три добиени победи, а разигрувањето започнува следниот викенд. Четвртфиналните парови се:

• КК МЗТ Скопје – КК Феникс
• КК ТФТ – КК Чаир
• КК Работнички – КК Пелистер
• МКК Куманово – КК Кожув

Во плеј-аутот за опстанок ќе се борат екипите на Тиквеш, Шкупи, Гостивар и Вардар.

Екипата на КК Гостивар го забележа најслабиот пласман во последните години и за првпат во својата понова историја ќе игра во плеј-аут за опстанок во Првата лига.

КК Гостивар заврши на 10-тото место во регуларниот дел, со биланс од 7 победи и 15 порази. Ова е првпат тимот од Гостивар да се најде во зоната на испаѓање откако се врати во највисокиот ранг, што претставува видлив пад во целиот перформанс споредено со претходните сезони. Иако низ сезоната избраниците на Љупчо Малинков имаа моменти на доминација, некомплетниот ростер, недоследностите во играта ги доведоа до оваа позиција.

Сепак, натпреварувањето не е завршено!

КК Гостивар влегува во плеј-аутот каде секој натпревар ќе биде решавачки за опстанок. На тимот му е неопходна поддршка, со јасна цел да се избегне испаѓање во Втората лига. Со максимална борба и посветеност, Гостивар има реална шанса да го задржи прволигашкиот статус и да ја спаси честа на клубот. А, со оглед на состојбата во македонската кошарка и авантурите кои не очекуваат, натпреварите што ќе следат во „Младост“ не се само борба за бодови, туку и директна битка за спас на кошарката во Гостивар.

Распоред на натпреварите на КК Гостивар во плеј-аутот:

• 19.04. 18:00 | Гостивар – Шкупи
• 26.04. 18:00 | Тиквеш – Гостивар
• 30.04. 18:00 | Гостивар – Вардар
• 03.05. 18:00 | Шкупи – Гостивар
• 10.05. 18:00 | Гостивар – Тиквеш
• 14.05. 18:00 | Вардар – Гостивар

Разигрувањето ќе се игра според лига-систем, секој против секого, дома и на гости. Крајниот пласман ќе одлучи кои два тима ќе обезбедат опстанок, а кои ќе ја напуштат Првата лига.