Завршна приредба и 55 години јубилеј на градинките во Гостивар

Весел, возбудлив и свечен ден беше денешниот во гостиварските градинки, во кој се споија неколку убави поводи. Дечињата од големите групи ја имаа традиционалната завршна приредба, градинките воедно прославија 55 години јубилеј, а датумот (1 јуни) е и Светски ден на детето.

Свеченоста се одржа во дворот на градинката „Пролет“, каде дечињата полни со насмевки, радост и ведрина преку песни, рецитирање и игра кажаа „Збогум градинке“ и испратија искрени пораки за среќно детство, за мир и среќа, за љубов и добрина во целиот свет.

На настанот присуствуваше и градоначалникот, Арбен Таравари.

„Решивме на Меѓународниот ден на децата 1 јуни да бидеме овде во градинката, кадешто имаме нови инвестиции: детско катче и нова фасада на објектот. Нема подобар начин да им се посака здравје, успех и радост на децата, отколку со инвестирање во условите во коишто тие живеат, а знаеме дека една третина од детскиот живот поминува во градинка и училиште.“, рече градоначалникот.

Оваа година од градинките кои се во склоп на Јавната установа „Детска радост“ во Гостивар излегуваат 268 деца, идни првачиња.