Завршни приредби во гостиварските градинки – „Збогум градинке“ рекоа 189 деца

За дечињата од големите групи во градинките, ова е возбудлив период со кој заокружуваат еден дел од своето детство. Од септември ќе седнат во училишните клупи како првачиња и ги очекуваат нови предизвици.

По тој повод, во градинките во Гостивар традиционално секоја година се одржуваат завршните приредби.  Овој пат, наместо една заедничка, во секоја работна единица се организираше посебна манифестација „Збогум градинке“. Последната се случи  денес во објектот „Пчелка“.

„Ова е прекрасна манифестација и задоволни сме во вакви пандемиски услови со посебни протоколи успеавме да ги испратиме децата, како што е традицијата. Секако тоа е заслуга на тимот, сите вработени посветени на децата кои се најважниот дел од нашето работење. Среќни деца, среќни родители, среќен тим, успешна работа. На сите првачиња им посакувам многу успеси понатаму, а исто така и на тимот и во иднина.“, рече Даниела Бошкоска, директорка на градинките во Гостивар.

Како што е редот, дечињата со песни и рецитирање се збогуваа со градинката и нивните учителки, кои им беа втори мајки во изминатите години.

фото:ЈУДГ „Детска Радост“