Здрави вкусни сосови кои се одлична замена за кечап и мајонез

Кечапот и мајонезот се омилени додатоци на главните јадења, но сите знаеме дека не се добри за здравјето. Еве неколку предлози на рецепти за подготовка на сосови кои лесно може да ги заменат и кечапот и мајонезот, а се многу поздрави и се подготвуваат со природни состојки.

Шпански салса сос

Состојки:
15 шери домати
1 чешне лук
20 г млад кромид
20 г копар
1 лажичка балсамико
1 лажица доматно пире
1 лажица маслиново масло
сол и црн пипер по вкус

Подготвување:
Ставете ги во блендер доматите, лукот, кромидот и копарот и мешајте ги додека не добиете паста. Во тоа смеса додадете балсамико, паста од домати и маслиново масло. Додадете сол и црн пипер.

Прелив за салата

Состојки:
3 лажици маслиново масло
2 лажици балсамико
1 чешне лук
сол и црн пипер по вкус

Подготовка:
Исечкајте го чешнето лук. Истурете маслиново масло и балсамико во мал сад и додадете го лукчето, сол и црн пипер, затворете го садот со капак и добро измешајте. Овој сос ќе биде одличен прелив за вашата салата

Сос од копар

Состојки:
20 г копар
6 чешниња лук
1 лимон
½  лажичка кора од лимон
100 мл маслиново масло
сол по вкус

Подготовка:
Ситно исечкајте го копарот. Изрендајте ја кората од лимон и исцедете го сокот. Ставете ги сите состојки во блендер и мешајте, а потоа префрлете го сосот во тегла. Одлично оди со месо, риба или со салата од свежи краставици.

Кисело-сладок сос

Состојки:
4 лажици вода
1 лажичка пченкарно брашно
2 лажици шеќер
2 лажици оцет
1 лажица доматно пире
1 лажица сос од соја
3 лажици сок од портокал

Подготовка:
Во мала чинија измешајте го брашното во зовриена вода. Во тенџерче измешајте ги шеќерот, оцетот, доматното пире, сосот од соја и сок од портокал. Додадете ја мешавината од пченкарно брашно и ставете ја на шпоретот. Кога ќе зоврие, тргнете го сосот од огнот. Овој сос ќе го оживее вкусот на зготвено месо и може да биде одличен додаток за печеното месо.

Песто сос

Состојки:
60 г босилек
2 чешниња лук
50 г пармезан
3 лажици пињоли
100 мл маслиново масло
Сол по вкус

Подготовка:
Измијте го и исушете го босилекот. Исечкајте го лукот и сите состојки ставете ги во блендер: лук, босилек (цели стебленца), пармезан, пињоли, третина од маслиновото масло и малку сол. Измешајте, постепено додавајќи го остатокот од маслиновото масло за да се добие потребната конзистентност. Готовото песто мора да биде хомогено!

Во Италија, песто сосот се јаде со шпагети, со полнети кнедли, со фетучини. Честопати се става на свински шницли, на пилешко или на риба пред печењето, а се додава и во различни салати со морски плодови.

Сос од сирење

Состојки:
200 г топено сирење
10 мл зејтин
200 мл неутрална павлака
3 лажици пињоли
50 г тврдо сирење
зачини по желба

Подготовка:
Изрендајте го тврдото сирење. Во мал сад измешајте ги растопеното сирење, зејтин и неутрална павлака. Варете ја оваа смеса на тивок оган додека не зоврие. Намалете ја топлината и додадете го тврдото сирење и зачините во вашиот сос. Варете уште три минути и исклучете.