Здравствени прегледи, домашни посети и пакети со храна за постарите граѓани

„Неделата на грижа за стари лица“ во Гостивар се одбележува со повеќе активности чија цел е да се сврти вниманието на јавноста кон граѓаните од трета доба, да им пружи помош и да им се посвети време.

Активностите ги организира Црвениот Крст Гостивар во соработка со Здружението  на Пензионери и општата болница „ Ферид Мурат ”.

„Во просторите на Црвениот Крст на старите лица им се мереше крвен притисок и  шеќер во крвта. Исто така, лицата од третата доба можеа директно да се консултираат за своето здравје и нивните права со докторите Бесник Зеќири и Енес Јашари и стручната служба при Општинската организација“, изјави Мерита Алили, секретар на гостиварскиот Црвен Крст.

И младите волонтери од Црвениот крст дадоа свој придонес во одбележувањето на „Неделата за грижа на стари лица“. Тие посетија дваесетина граѓани од постарата генерација во нивните домови и им поделија пакети со храна. Пакетите беа донирани од  Мега Маркет Монтенегро Гостивар.

Годинава во рамките на Регионалниот проект „Преземи акција за социјална инклузија на старите лица“,формирана е мрежа на граѓански организации – ИнклузиваМ за социјална инклузија на старите лица. Девет граѓански организации ќе дејствуваат заедно за да се зголеми свеста на јавноста и последователно да се влијае во процесите на донесување одлуки за социјално вклучување на старите лица во земјата.