Здружението на Кастрати ќе гради домови за 5 социјални семејства во Гостивар

Пет сиромашни семејства на подрачјето на општина Гостивар, ќе добијат свои домови како донација од косовското Добротворно здружение „Балкански сираци“  чиј претседател е хуманитарецот Халил Кастрати. Предвидено е изградбата на куќите за семејствата да започне во текот на оваа година. Со финансиска и логистичка поддршка во хуманата мисија ќе се вклучи и гостиварската локална самоуправа.

Кастрати денес беше прогласен за почесен граѓанин на општина Гостивар, а градоначалникот Арбен Таравари му го врачи признанието „Златен клуч на градот“.

„Се надевам дека ова ќе биде добар пример за сите нас и за младите, да сфатат дека животот брзо поминува, а добрите дела се оние кои се паметат засекогаш.“, рече градоначалникот.

Кастрати се заблагодари за доделеното признание и изрази надеж дека домовите што ќе се градат ќе им го олеснат животот на семејствата.

Хуманитарната организација „Балкански сираци“ им излегува во пресрет на социјално загрозени семејства кои немаат покрив над главата и гладуваат. Кастрати обезбедува помош и за лекување на болни луѓе и деца, во случаи кога не се во состојба сами да го платат лекувањето.